శ్రీకాళహస్తీశ్వర శతకము - ధూర్జటి

  *  "అమ్మా, యయ్య" యటంచునెవ్వరిని నేనన్నన్శివా ! నిన్ను నే
      సుమ్మీ నీ మదిఁ దల్లిదండ్రులనటంచు న్జూడఁగాఁబోకు నా
      కిమ్మైఁ దల్లియు దండ్రియున్ గురుఁడు నీవేకాన సంసారపుం
      జిమ్మంజీకటిఁ గప్పినన్ గడుపు నన్ శ్రీకాళహస్తీశ్వరా !  

    * అకలంకస్థితి నిల్పి, నాదమను ఘంటారావమున్ బిందు దీ
      పకళాశ్రేణి వివేకసాధనములొప్పన్బూని యానంద తా
      రక దుర్గాటవిలో మనోమృగము గర్వస్ఫూర్తి వారించు వా
      రికిగా వీడు భవోగ్రబంధలతికల్ శ్రీకాళహస్తీశ్వరా !!  

    * అడుగంబోనిక నన్యమార్గరతులం బ్రాణావనోత్సాహినై
      యడుగంబోయినబోదు నీదుపదపద్మారాధక శ్రేణియు
      న్నెడకున్ నిన్ను భజింపగా గనియు నాకేలా పరాపేక్ష ? కో
      రెడిదింకేమి ? భవత్ప్రసాదమమె తగున్ శ్రీకాళహస్తీశ్వరా !!  

    * అమరస్త్రీలరమించినన్ జెడదు మోహంబింతయున్, బ్రహ్మ ప
      ట్టము సిద్ధించిన నాసదీరదు, నిరూఢక్రోధమున్ సర్వలో
      కముల న్మ్రింగినమాన, దిందుగల సౌఖ్యంబొల్ల, నీసేవ చే
      సి మహాపాతక వారిరాశిఁ గడతున్ శ్రీకాళహస్తీశ్వరా !!  

    * అయవారై చరియింపవచ్చు తన పాదాంభోజ తీర్ధంబులన్
      దయతో గొమ్మనవచ్చు సేవకుని నర్థప్రాణదేహాదుల
      న్నియు నా సొమ్మనవచ్చు గాని, నరుల న్నిందింప, నిన్నాత్మ ని
      ప్క్రియతన్ గానగరాదు పండితులకున్ శ్రీకాళహస్తీశ్వరా !!  

    * అల యేకార్ణవ వేళ నీవు వటపత్రాకారమై యుండఁగా
      చెలువంబొప్పఁగ మాధవుండు గలిగెన్ జేరంగఁజోటంచుదా
      నెలమిం దామరతంపరై బ్రతికి నాఁడింతాకుపై నుండియే
      సిలుగుల్ పొందక నీ కతంబునగదా శ్రీకాళహస్తీశ్వరా !  

ఆ (4)    

    * ఆరావంబుదయించెఁ దారకముగా నాత్మాభ్రవీధి న్మహా
      కారోకారమకార యుక్తమగు నోంకారాభిధానంబు చె
      న్నారు న్విశ్వమనంగఁ దన్మహిమచే నా నాదబిందుల్సుఖ
      శ్రీ రంజిల్లఁ గడంగు, నీవదె సుమీ ! శ్రీకాళహస్తీశ్వరా !!  

    * ఆలంచు న్మెడగట్టి, దానికి సపత్యశ్రేణి కల్పించి, త
      ద్బాలవ్రాతమునిచ్చి పుచ్చుకొను సంబంధంబుగావించి యా
      మాలర్కంబున బాంధవంబనెడి ప్రేమం గొందరం ద్రిప్పగా,
      సీలన్సీల నమర్చినట్లొసగితో శ్రీకాళహస్తీశ్వరా !!  

    * ఆలుంబిడ్డలు మిత్రులున్ హితులు నిష్టార్ధంబు లీనేర్తురే
      వేళ న్వారిభజింప జాలిపడ కావిర్భూత మోదంబునన్
      గాలం బెల్ల సుఖంబు నీకు, నిక భక్తశ్రేణి రక్షింప కే
      శ్రీ లెవ్వారికిఁ గూడఁబెట్టెదవయా ? శ్రీకాళహస్తీశ్వరా !!  

    * ఆలున్ బిడ్డలు తల్లిదండ్రులు ధనంబంచు న్మహాభందనం
      బేలా నామెడఁ గట్టినాఁడవిఁక నిన్నే వేళఁ జింతింతు, ని
      ర్మూలంబైన మనంబులోనఁ గడుదుర్మోహాబ్ధిలోఁ గ్రుంకి యీ
      సీలామాలపుఁ జింతనెట్లుడిపెదో శ్రీకాళహస్తీశ్వరా !  

ఇ (0)    

ఈ (0)    

ఉ (0)    

ఊ (2)    

    * ఊరూరం జనులెల్ల భిక్షమిడరో, యుండం గుహల్గల్గవో
      చీరానీకము వీధులం దొరకదో, శీతామృత స్వచ్ఛవాః
      పూరం బేరులఁ బారదో తపసులం బ్రోవంగ నీవోపవో
      చేరం బోవుదురేల రాజుల జనుల్ శ్రీకాళహస్తీశ్వరా !!  

    * ఊరూరన్ బవినీని కాండ్లు కవులై యొక్కొక్కచోఁ గొందఱన్
      కేరే మీరును బాణకాదురనుచున్ గీతాలు బోధింపఁగా
      సారాసారమెఱుంగలేక మిగులంజౌకయ్యెగా పద్యముల్
      జేరంజోటికనేది సత్కవులకున్ శ్రీకాళహస్తీశ్వరా !  

ఋ (0)    

ౠ (0)    

ఎ (1)    

    * ఎన్నేళ్ళుండుదు? నేమిగందు? నిక నేనెవ్వారి రక్షించెదన్?
      నిన్నే నిష్ఠ భజించెద న్నిరుపమోన్నిద్రప్రమోదంబు నా
      కెన్నండబ్బెడు నెంతకాలమిక నేనిట్లున్న నన్నీయెడం?
      చిన్నంబుచ్చక నన్ను నేలుకొనవే ! శ్రీకాళహస్తీశ్వరా !!  

ఏ (2)    

    * ఏ లీలన్నుతియింప వచ్చు నుపమోత్ప్రేక్షాధ్వనివ్యంగ్య శ
      బ్దాలంకార విశేషభాషల కలభ్యంబైన నీ రూపముం
      చాలుంజాలుఁ గవిత్వము న్నిలుచునే సత్యంబు వర్ణించుచో
      ఛీ ! లజ్జింపరు గాక మాదృశకవుల్ శ్రీకాళహస్తీశ్వరా !!  

    * ఏ వేదంబు పఠించె లూత, భుజగంబే శాస్త్రముల్చూచె దా
      నే విద్యాభ్యసనం బొనర్చెగరి, చెంచే మంత్రమూహించె, భో
      దావిర్భావనిధానముల్ చదువులయ్యా ? కావు! మీపాద సం
      సేవాసక్తియె కాక జంతుతతికిన్ శ్రీకాళహస్తీశ్వరా !!  

ఐ (0)    

ఒ (3)    

    * ఒక పూటించుక కూడు తక్కువగునే నోర్వంగలే, డెండకో
      పక నీడన్వెదకుం, జలిం జడిసి కుంపట్లెత్తుకోఁ జూచు, వా
      నకు నిళ్ళిళ్ళును దూరు, నీ తనువు దీనన్వచ్చు సౌఖ్యంబు రో
      సి కడాసింపరుగాక మర్త్యులకటా ! శ్రీకాళహస్తీశ్వరా !!  

    * ఒకయర్థంబును నిన్ను నే నడుగఁగా నూహింప నెట్లైన బొ
      మ్ము కవిత్వంబులు నాకు జెందవని యేమోయంటివా నాదు జి
      హ్వకు నైసర్గిక కృత్యమింతయు సుమీ ప్రార్థించుటే కాదు కో
      రికల న్నిన్నును గాన నాకు వశమా శ్రీకాళహస్తీశ్వరా !  

    * ఒకరింజంపి పదస్థులై బ్రతుక తామొక్కొక్కరూహింతురే
      లొకొ ? తామెన్నడు జావరో ? తమకు బోవోసంపదల్ ? పుత్ర మి
      త్ర కళత్రాదులతోడ నిత్యసుఖమందంగందురో ? యున్నవా
      రికి లేదో మృతి యెన్నడుం గటకటా ! శ్రీకాళహస్తీశ్వరా !!  

ఓ (0)    

ఔ (0)    

అం (2)    

    * అంతా సంశయమే శరీర ఘటనంబంతా విచారంబె లో
      నంతా దుఃఖపరంపర్వాన్వితమె, మేనంతా భయభ్రాంతమే
      యంతానాంత శరీర శోషణమె దుర్వ్యాపారమే దేహికిన్
      చింతన్నిన్నుదలంచి పొందరు నరుల్ శ్రీకాళహస్తీశ్వరా !!  

    * అంతామిథ్య తలంచిచూచిన నరుండట్లౌ టెరింగిన్ సదా
      కాంతల్పుత్రులు నర్ధముల్ తనువు నిక్కంబంచు మోహార్ణవ
      భ్రాంతింజెంది చరించుగాని, పరమార్థంబైన నీయందుఁ దాఁ
      జింతాకంతయుఁ జింతనిల్పడు గదా శ్రీకాళహస్తీశ్వరా !  

అః (0)    

క (8)    

    * కరి దైత్యున్బొరిగొన్న శూలము కరగ్రస్తంబుగాదో , రతీ
      శ్వరునిన్ కాల్చిన ఫాలలోచన శిఖావర్గంబు చల్లారెనో
      పరనిందా పరులన్వధింప విదియున్ భావ్యంబె ? వారేమి చే
      సిరి నీకున్బరమోపకార మరయన్ శ్రీకాళహస్తీశ్వరా !  

    * కలధౌతాద్రియు నస్థిమాలికయు, గోగంధర్వమున్బున్కయుం
      బులితోలున్బసితంబు, బాపతొడవుల్పోకుండ, దోబుట్లకై
      తొలినేవారల తోడబుట్టగ గళాదుల్గల్గె మేలయ్యె నా
      సిలవుల్దూరము చేసి కొంటెరిగియే శ్రీకాళహస్తీశ్వరా !!  

    * కలలంచు న్శకునంబులంచు గ్రహయోగంబంచు సాముద్రికం
      బులటంచుం దెవులంచు, దిష్టియనుచు న్భూతంబులంచు న్విషా
      దులటంచు న్నిమిషార్ధ జీవనములందుం బ్రీతిఁ బుట్టించి నా
      సిలుగుల్ ప్రాణులకెన్ని చేసితివయా ! శ్రీకాళహస్తీశ్వరా !!  

    * కాయల్గాచె వధూనఖాగ్రములచే గాయంబు, వక్షోజముల్
      రాయన్రాపడె ఱొమ్ము, మన్మథ విహారక్లేశ విభ్రాంతిచే
      ప్రాయంబాయెను, బట్టగట్టె తల, చెప్పన్ రోత సంసారమే
      జేయంజాల, విరక్తు జేయగదవే, శ్రీకాళహస్తీశ్వరా !!  

    * కాలద్వార కవాటబంధనము, దుష్కాల ప్రమాణక్రియా
      లీలాచాలక చిత్రగుప్త ముఖవల్మీకోగ్ర జిహ్వాద్భుత
      వ్యాళ వ్యాళవిరోధి, మృత్యుముఖదంష్ట్రాహార్య వజ్రంబు ది
      క్చేలాలంకృత ! నీదు నామ మరయన్ శ్రీకాళహస్తీశ్వరా !!  

    * కాసంతైన సుఖంబొనర్చునొ, మనఃకామంబు లీడేర్చునో
      వీసంబైనను వెంటవచ్చునొ జగద్విఖ్యాతి గావించునో
      దోసంబు ల్వెడబాపునో, వలసినం దోడ్తో మిముం జూపునో
      ఛీ! సంసారదురాశలేలుడుపవో ! శ్రీకాళహస్తీశ్వరా !!  

    * కేదారాది సమస్త తీర్థములు కోర్కింజూడ బోనేటికిన్
      గాదాముంగిలి వారణాసి కడుపే కైలాసశైలంబు నీ
      పాదధ్యానము సంభవించునపుడే భావింప నజ్ఞాన ల
      క్ష్మీదారిద్ర్యులుగారె లోకు లకటా ! శ్రీకాళహస్తీశ్వరా !!  

    * కొడుకుల్ పుట్టరటంచునేడ్తు రవివేకుల్ జీవనభ్రాంతులై
      కొడుకుల్ పుట్టరె కౌరవేంద్రున కనేకుల్ ? వారిచే నే గతుల్
      వడసెం ? పుత్రులు లేని యా శుకునకున్ వాటిల్లెనే దుర్గతుల్
      చెడునే మోక్షపదం బపుత్రునకున్ శ్రీకాళహస్తీశ్వరా !  

ఖ (0)    

గ (2)    

    * గతినీవంచు భజించువార లపవర్గంబొందఁగానేల సం
      తతముం గూటికినై చరింప వినలేదా "యాయురన్నం ప్రయ
      చ్ఛతి" యంచున్మొఱవెట్టఁగా శ్రుతులు సంసారాంధకారాభిదూ
      శిత దుర్మార్గులు గానఁ గానఁబడవో శ్రీకాళహస్తీశ్వరా !  

    * గ్రహదోషంబులు దుర్నిమిత్తములు నీ కల్యాణనామంబు ప్ర
      త్యహమున్ బేర్కొను నుత్తమోత్తముల బాధంబెట్టగానోవునే
      దహనుంగప్పగ జాలునే శలభ సంతానంబు ? నీ సేవచే
      సి హతక్లేశులు గారుగాక మనుజుల్ ! శ్రీకాళహస్తీశ్వరా !!  

ఘ (1)    

    * ఘడియల్ రెంటికొ మూటిఁకో ఘడియకో కాదేని నేఁడెల్లియో
      కడనేఁడాదికొ యెన్నడో యెరుఁగ మీ కాయంబు లీ భూమిపైఁ
      బడఁగానున్నవి, ధర్మమార్గమొక్కటిం బాటింపరీ మానవుల్
      చెడుగుల్ నీ పదభక్తియుం దెలియరో శ్రీకాళహస్తీశ్వరా !!  

ఙ (0)    

చ (5)    

    * చదువుల్నేర్చిన పండితాధములు స్వేచ్ఛాభాషణక్రీడలన్
      వదరన్, సంశయ భీకరాటవుల త్రోవల్దప్పి వర్తింపగా
      మదనక్రోధ కిరాతులందు గని భీమప్రౌఢిచే దాకినం
      చెదురుంజిత్తము, చిత్తగింపగదవే శ్రీకాళహస్తీశ్వరా !!  

    * చనువారిం గని యేడ్చువారు జముడా ! సత్యంబుగావత్తు మే
      మనుమానం బికలేదు నమ్మమని తారావేళ నా రేవునన్
      మునుగంబోవుచు బాసచేయుటసుమీ ముమ్మాటికింజూడగా
      జెనటుల్గానరు దీని భావమిదివో శ్రీకాళహస్తీశ్వరా !!  

    * చవిగాఁజూడ వినంగ మూర్కొనఁ దనూసంఘర్షణాస్వాద మొం
      ద వినిర్మించెదవేల జంతువుల నేతత్క్రీడలే పాతక
      వ్యవహారంబులు సేయనేమిటికి మాయావిద్యచేఁ బ్రొద్దుపు
      చ్చి వినోదింపగఁ దీన నేమిఫలమో శ్రీకాళహస్తీశ్వరా !  

    * చావంగాలము చేరువౌ టెరింగియుం చాలింపగాలేక, త
      న్నేవైద్యుండు చికిత్సఁ బ్రోవగలడో ? యేమందు రక్షించునో ?
      ఏవేల్పుల్ కృపఁ జూతురో ? యనుచు, నిన్నింతైన చింతింపఁ డా
      జీవచ్ఛ్రాద్ధము చేసికొన్న యతియున్ శ్రీకాళహస్తీశ్వరా !!  

    * చెడుగుల్ కొందరు గూడి చేయఁగఁ బనుల్ చీకట్ల దూరంగ బా
      ల్పడితింగాని చరింపరాని నిను నొల్లంజాలుఁ బొమ్మంచు ని
      ల్వెడలం ద్రోచినఁ జూరుపట్టుకొని నే వ్రేలాడుదుం గోర్కెఁ, గో
      రెడి యర్థంబులు నాకు నేల యిడవో శ్రీకాళహస్తీశ్వరా !!  

ఛ (0)    

జ (4)    

    * జలకంబుల్, రసముల్, ప్రసూనములు వాచాబంధముల్వాద్యము
      ల్కల శబ్దధ్వను లంచితాంబర మలంకారంబు, దీప్తుల్మెరుం
      గులు, నైవేద్యము మాధురీమహిమగాఁగొల్తున్నినున్ భక్తిరం
      జిల దివ్యార్చన గూర్చి నేర్చిన క్రియన్ శ్రీకాళహస్తీశ్వరా !!  

    * జలజశ్రీ గల మంచినీళ్ళు గలవా ? చట్రాతిలో బాపురే !
      వెలి వాడన్మఱి బాఁపనిల్లు గలదా ? వేసాలు గా కక్కటా !
      నలి నా రెండు గుణంబులెంచి మదిలో నన్నేమి రోయంగ నీ
      చెలువంబైన గుణంబు లెంచుకొనవే శ్రీకాళహస్తీశ్వరా !  

    * జాతుల్సెప్పుట, సేవచేయుట, మృషల్ సంధించు టన్యాయవి
      ఖ్యాతిం బొందుట, కొండెగాడవుట, హింసారంభకుండౌట, మి
      థ్యాతాత్పర్యములాడుటన్నియుఁ బరద్రవ్యంబు నాశించి, యీ
      శ్రీ తానెన్ని యుగంబు లుండగలదో శ్రీకాళహస్తీశ్వరా !!  

    * జ్ఞాతుల్ ద్రోహులు వాండ్రుసేయు కపటేర్ష్యాది క్రియాదోషముల్
      మాతండ్రాన సహింపరాదు, ప్రతికర్మంబించుకే జేయగా
      బోతే దోషముగాన మాని, యతినై పోగోరినన్ సర్వదా
      చేతః క్రోధము మానదెట్లు నడుతున్ శ్రీకాళహస్తీశ్వరా !!  

ఝ (0)    

ఞ (0)    

ట (0)    

ఠ (0)    

డ (0)    

ఢ (0)    

ణ (0)    

త (8)    

    * తనయుంగాంచి, ధనంబునించి, దివిజస్థానంబు గట్టించి, వి
      ప్రున కుద్వాహము చేసి, సత్కృతికి పాత్రుండై, తటాకంబుఁ నే
      ర్పున ద్రవ్వించి, వనంబువెట్టి, మననీ, పోలేడు నీ సేవ జే
      సిన పుణ్యాత్ముడు పోవు లోకమునకున్ శ్రీకాళహస్తీశ్వరా !!  

    * తను వెందాక ధరిత్రినుండు ననునందాక న్మహారోగ దీ
      పన దుఃఖాదుల బొందకుండ ననుకంపాదృష్టి వీక్షించి యా
      వెనుక న్నీ పద పద్మముల్దలచుచు న్విశ్వప్రపంచంబు బా
      సిన చిత్తంబున నుండచేయ గదవే శ్రీకాళహస్తీశ్వరా !!  

    * తనువే నిత్యముగానొనర్పు మదిలేదా, చచ్చి, జన్మింపకుం
      డ నుపాయంబు ఘటింపు, మీ గతులరెంటన్నేర్పులేకున్న లే
      దని నాకిప్పుడె చెప్పు; చేయగల కార్యంబున్న సంసేవ జే
      సి నినుంగాంచెదగాక కాలముననో శ్రీకాళహస్తీశ్వరా !!  

    * తమ నేత్రద్యుతిఁ దామెచూడ సుఖమై తాదాత్త్యమున్గూర్పఁగా
      విమలమ్ముల్కడు లాభము ల్జిత లసద్విద్యుల్లతా లాస్యముల్
      సుమనోబాణ జయప్రదమ్ము లనుచున్ చూచున్ జనంబూని హా
      రిమృగాక్షీనివహమ్ము కన్నుఁగవలన్ శ్రీకాళహస్తీశ్వరా !!  

    * తమకంబొప్పఁ బరాంగనాజన పరద్రవ్యంబులన్ మ్రుచ్చిలం
      గ మహోద్యోగముసేయు నెమ్మనము దొంగంబట్టి వైరాగ్య పా
      శములంజుట్టి బిగించి నీదు చరణస్తంభంబునం గట్టివై
      చి ముదంబెప్పుడు గల్గజేయగదవో శ్రీకాళహస్తీశ్వరా !!  

    * తరగల్ పిప్పలపత్రముల్ మెరుగుటద్దంబుల్ మరుద్దీపముల్
      కరికర్ణాంతము లెండమావులతతుల్ ఖద్యోతకీటప్రభల్
      సురవీధీలిఖితాక్షరంబు లసువుల్ జ్యోత్స్నాపయఃపిండముల్
      సిరులందేల మదాంధులౌదురు జనుల్ ! శ్రీకాళహస్తీశ్వరా !!  

    * తలమీదం గుసుమప్రసాద మలిక స్థానంబుపై భూతియున్
      గళసీమంబున దండ నాసికతుద న్గంధప్రసారంబు లో
      పల నైవేద్యము జేర్చునే మనుజు డా భక్తుండు నీకెప్పుడుం
      జెలికాడై విహరించు రౌష్యగిరిపై శ్రీకాళహస్తీశ్వరా !!  

    * తాతల్ తల్లియుఁ దండ్రియున్ మరియు బెద్దల్చావగా చూడరో
      భీతిం బొందఁగ నేల చావునకుఁగాఁ, బెండ్లాము బిడ్డల్హిత
      వ్రాతంబుల్తిలకింప జంతువులకు న్వాలాయమై యుండఁగాఁ
      జేతోవీధి నరుండు నిన్గొలువఁడో శ్రీకాళహస్తీశ్వరా !!  

థ (0)    

ద (7)    

    * దంతంబుల్పడనప్పుడే తనువునం దార్ఢ్యంబు నున్నప్పుడే
      కాంతాసంఘము రోయనప్పుడె, జరాక్రాంతంబు గానప్పుడే
      వింతల్మేనఁ జరించనప్పుడె కురుల్వెల్వెల్ల గానప్పుడే
      చింతింపన్వలె నీ పదాంబుజములన్ శ్రీకాళహస్తీశ్వరా !!  

    * దయఁజూడుండని గొందరాడుదురు నిత్యంబున్నినుం గొల్చుచున్
      నియమంబెంతొ ఫలంబునంతియగదా ? నీవీయ పిండెంతొ యం
      తియకా నెప్పటికిం దళం బశనబుద్ధిం జూడ నేలబ్బు న
      త్క్రియలన్నిన్ను భజింప కిష్టసుఖముల్ శ్రీకాళహస్తీశ్వరా !!  

    * దినముం జిత్తములో సువర్ణముఖరీతీరప్రదేశామ్ర కా
      నన, మధ్యోపలవేదికాగ్రమున నానందంబునం పంకజా
      సన నిష్ఠన్నిను జూడగన్న నదివో సౌఖ్యంబు లక్ష్మీవిలా
      సిని మాయనటనల్ సుఖంబులగునే శ్రీకాళహస్తీశ్వరా !!  

    * దివిజక్ష్మారుహ ధేను రత్నఘనభూతిన్ ప్రస్ఫురద్రత్నసా
      నువు నీవిల్లు, నిధీశ్వరుండుసఖు, డర్ణోరాశి కన్యావిభుం
      డు విశేషార్చకుఁ డింక నీ కెన ఘనుండున్ గల్గునే ? నీవు చూ
      చి విచారింపవు లేమి యెవ్వడుడుపున్ శ్రీకాళహస్తీశ్వరా !  

    * దురము న్దుర్గము రాయబారము మరిన్దొంగర్కము న్త్వెద్యమున్
      నరనాథాశ్రయ మోడబేరమును బెన్మంత్రంము సిద్ధించినన్
      అరయన్ దొడ్డఫలంబు గల్గు నదిగాకా కార్యమే తప్పినన్
      సిరియుంబోవును బ్రాణహానియు నగున్ శ్రీకాళహస్తీశ్వరా !!  

    * దొప్పెండెంగిలి దెచ్చియిచ్చినను గండూషాంబుధారావళిన్
      దొప్పం దోఁగిన చెప్పుగాల తలపై ద్రొక్కంగ నట్లైనఁ గ
      న్నప్పం బాత్రుని జేసితింతటికి సన్మానంబు దీపింపఁగా
      చెప్పన్నేరము నీ విహార మహిమల్ శ్రీకాళహస్తీశ్వరా !  

    * ద్వారద్వారములందుఁ గంచుకిజన వ్రాతంబు దండంబులన్
      దోరంతస్స్థలి బగ్గనంబొడుచుచున్ దుర్భాషలాడన్ మఱిన్
      వారింభ్రార్థనచేసి రాజులకు సేవల్సేయగాఁ బోరు ల
      క్ష్మీ రాజ్యంబును గోరి నీ పరిజనుల్ శ్రీకాళహస్తీశ్వరా !  

ధ (0)    

న (18)    

    * నిచ్చల్ నిన్ను భజించి చిన్మయ మహానిర్వాణపీఠంబు పై
      రచ్చల్సేయక, యార్జవంబు కుజనవ్రాతంబుచేగ్రాగి, భూ
      భృచ్చండాలుర గొల్చి వారు దనుగోపింపన్ బుధుం డార్తుడై
      చిచ్చారం జమురెల్ల జల్లుకొనునో శ్రీకాళహస్తీశ్వరా !!  

    * నిను నా వాకిలి గావుమంటినొ ? మరున్నీ లాలకభ్రాంతి గుం
      టెన పొమ్మంటినొ ? యెంగిలిచ్చితిను తింటేగాని కాదంటినో ?
      నిను నెమ్మిందగ విశ్వసించు సుజనానీకంబు రక్షింప చే
      సిన నా విన్నపమేల గైకొనవయా ? శ్రీకాళహస్తీశ్వరా !!  

    * నిను నిందించిన దక్షుపైఁ దెగవొ, వాణీనాథు శాసింపవో,
      చనువా నీ పదపద్మ సేవకులఁ దుచ్ఛంబాడు దుర్మార్గులం
      బెనుప న్నీకును నీఁదు భక్తతతికిన్ భేదంబు గానంగ వ
      చ్చెనొ, లేకుండిన నూరకుండగలవా ? శ్రీకాళహస్తీశ్వరా !!  

    * నిను సేవింపగ నాపదల్పొడమనీ, నిత్యోత్సవం బబ్బనీ
      జనమాత్రుండననీ, మహాత్ముడననీ, సంసారమోహంబు పై
      కొననీ జ్ఞానముగల్గనీ, గ్రహగతుల్ కుందింపనీ, మేలు వ
      చ్చిన రానీ, యవి నాకు భూషణములో శ్రీకాళహస్తీశ్వరా !!  

    * నిన్నం జూడరొ మొన్నఁజూడరొ జనుల్ నిత్యంబుఁజావంగ నా
      పన్నుల్గన్న నిధానమయ్యెడి ధనభ్రాంతి న్విసర్జింపలే
      కున్నా రెన్నఁడు నిన్ను గందురిక మర్త్యుల్ గొల్వరేమో నిను
      న్చిన్నంబుచ్చక ప్రోవకుండునెడలన్ శ్రీకాళహస్తీశ్వరా !  

    * నిన్ను న్నమ్మినరీతి నమ్మనొరులన్ నీకన్ననా కెన్న లే
      రన్నల్దమ్ములు తల్లిదండ్రులు గురుం డాపత్సహాయుండు నా
      యన్నా ! యెన్నడు నన్ను సంస్కృతి విషాదాంభోది దాటించి య
      చ్ఛిన్నానంద సుఖాబ్ధిదేల్చేదొ కదే ! శ్రీకాళహస్తీశ్వరా !!  

    * నిన్నేరూపముగా భజింతుమదిలో, నీ రూపుమోఁకాలొ, స్త్రీ
      చన్నో, కుంచమొ, మేకపెంటికయొ ? యీ సందేహముల్మాన్పి, నా
      కన్నారన్భవదీయమూర్తి సగుణాకారంబుగాఁ జూపవే
      చిన్నీ రేజ విహారమత్త మధుపా ! శ్రీకాళహస్తీశ్వరా !!  

    * నిప్పై పాతక దూలశైలమడచున్ నీనామము న్మానవుల్
      తప్పన్ దవ్వుల విన్న నంతకభుజాదర్పోద్ధత క్లేశముల్
      తప్పుందారును ముక్తులౌదురని శాస్త్రంబు ల్మహాపండితుల్
      చెప్పంగాఁ దమ కింక శంకవలెనా ? శ్రీకాళహస్తీశ్వరా !  

    * నీ కారుణ్యము గల్గినట్టి నరుడే నీచాలయంబుం జొరం
      డే కార్పణ్యపు మాటలాడ నరుగం డెవ్వారితో వేషముల్
      గైకోడే మతముల్భజింప డిల నే కష్టప్రకారంబులన్
      చీకాకై చెడిపోడు జీవనదశన్ శ్రీకాళహస్తీశ్వరా !!  

    * నీ పంచం బడియుండగా కలిగిన న్భిక్షాన్నమే చాలు, ని
      క్షేపం బబ్బిన రాజకీయముల నే సేవింపగా నోప, నా
      శాపాశంబుల జుట్టి త్రిప్పకుము సంసారార్ధమై, బంటుగా
      చేపట్టం దయగల్గెనేని మదిలో శ్రీకాళహస్తీశ్వరా !!  

    * నీ పేరున్, భవధంఘ్రి తీర్ధము భవన్నిష్ఠ్యూత తాంబూలముల్
      నీ పళ్ళెంబు ప్రసాదమున్ గొనికదా నే బిడ్డడైనాడ న
      న్నీ పాటిం గరుణింపు మోప నిక నే నెవ్వారికిం బిడ్డగాన్
      చేపట్టందగు పట్టి మానఁదగదో శ్రీకాళహస్తీశ్వరా !!  

    * నీ భక్తు ల్పదివేల భంగుల నినున్సేవింపుచున్ వేడగా
      లోభం బేటికి వారికోర్కులు కృపాళుత్వంబునం దీర్పరా
      దా ! భవ్యంబు దలంచి చూడు పరమార్థంబిచ్చి పొమ్మన్న నీ
      శ్రీ భాండారములో గొఱంత పడునా ? శ్రీకాళహస్తీశ్వరా !!  

    * నీ రూపంబు దలంపగా తుదమొద ల్నేగాన నీవైననున్
      రారా! రమ్మనియంచు చెప్పవు, వృథారంభంబు లింకేటికిన్
      నీరన్ముంపుము, పాలముంపు మిక నిన్నే నమ్మినాడన్ జుమీ
      శ్రీరామార్చిత పాదపద్మ యుగళా ! శ్రీకాళహస్తీశ్వరా !!  

    * నీకుం గాని కవిత్వమెవ్వరికి నే నీనంచు మీదెత్తితిన్
      జేకొంటిన్ బిరుదంబు, కంకణము ముంజేగట్టితిం, బట్టితిన్
      లోకుల్ మెచ్చ వ్రతంబు, నా తనువుకీలున్ నేర్పులుం గావు, ఛీ
      ఛీ ! కాలంబులరీతి దప్పెడుజుమీ శ్రీకాళహస్తీశ్వరా !!  

    * నీకున్ మాంసము వాంఛయేని కరువా? నీ చేతలేడుండగా
      జోకైనట్టి కుఠారముండ ననలజ్యోతుండ నీరుండగా
      పాకం బొప్ప ఘటించి చేతిపునుకన్ భక్షింప కా బోయచే
      చేకొంటెంగిలి మాంస మిట్లు తగునా ? శ్రీకాళహస్తీశ్వరా !!  

    * నీతో యుద్ధముఁ చేయనోప, గవితానిర్మాణ శక్తిన్నిన్నున్
      బ్రీతుం చేయఁగలేను, నీ కొరకుఁ తండ్రిన్ జంపగాజాల నా
      చేతన్ రోకట నిన్ను మొత్త వెరతున్ ; జీకాకు నా భక్తి యే
      రీతి న్నాకిఁక నిన్ను చూడగనగున్ శ్రీకాళహస్తీశ్వరా !  

    * నీనా యం దొడబాటుమాట వినుమా ! నీచేత జీతంబునేఁ
      గానింబట్టక, సంతతంబు మదివేడ్కన్ గొల్తు, సంతస్సప
      త్నానీకంబున కొప్పగింపకుము నన్నాపాటియేచాలు, తే
      జీనొల్లం గరినొల్ల నొల్లసిరులన్ శ్రీకాళహస్తీశ్వరా !!  

    * నీపై గావ్యము చెప్పుచున్న యతడు న్నీ పద్యముల్ వ్రాసి యి
      మ్మా పాఠంబొనరింతు నన్నయతడున్ మంజుప్రబంధంబు ని
      ష్టాపూర్తిం బఠియించుచున్నయతడున్ సద్బాంధవుల్ గాక ఛీ
      ఛీ ! పృష్ఠాగత బాంధవంబు నిజమా ! శ్రీకాళహస్తీశ్వరా !!  

ప (8)    

    * పటవద్రజ్జుభుజంగవద్రజత విభ్రాంతి స్ఫురచ్ఛుక్తి వ
      ద్ఘటవ చ్చంద్రశిలాజపాకుసుమ రుక్సాంగత్య వత్తంచు వా
      క్పటిమల్నేర్తురు చిత్సుఖంబనుభవింపన్ లేక దుర్మేధసుల్
      చిటుకన్నం దలపోయఁజూతురధముల్ శ్రీకాళహస్తీశ్వరా !  

    * పదివేలైనను లోకకంటకులచేఁ బ్రాప్తించు సౌఖ్యంబు నా
      మదికిం బథ్యముగాదు సర్వమునకున్ మధ్యస్థుఁడై సత్యదా
      న దయాదుల్గల రాజు నా కొసఁగు మెన్నన్వాని నీయట్ల చూ
      చి దినంబున్ముద మొందుదుం గడపటన్ శ్రీకాళహస్తీశ్వరా !  

    * పదునాల్గేలె మహాయుగంబులొక భూపాలుండు, చల్లించెన
      య్యుదయాస్తాచలసంధి నాజ్ఞ నొక డాయుష్మంతుడై వీరి య
      భ్యుదయంబెవ్వరు చెప్పగా వినరొ ? యల్పుల్మత్తులై యేల చ
      చ్చెదరో రాజులమంచు నక్కటకటా ! శ్రీకాళహస్తీశ్వరా !!  

    * పరిశీలించితి మంత్రతంత్రములు చెప్పన్వింటి సాంఖ్యాది యో
      గరహస్యంబులు వేదశాస్త్రములు వక్కాణించితిన్ శంక వో
      దరయం గుమ్మడికాయలోను యవగింజంతైన నమ్మించి సు
      స్థిర విజ్ఞానము త్రోవఁ జూపగదవే శ్రీకాళహస్తీశ్వరా !!  

    * పవమానాశన భూషణప్రకరము, ల్భద్రేభచర్మంబు, నా
      టకవిత్వంబు ప్రియంబులై, భుజగశుండాలాటవీచారులన్
      భవదుఃఖంబుల బాపుటొప్పుఁ చెలదిం బాటించి కైవల్య మి
      చ్చి వినోదించుట కేమి కారణమయా శ్రీకాళహస్తీశ్వరా !!  

    * పవి పుష్పంబగు, నగ్నిమంచగు, నకూపారంబు భూమీస్థలం
      బవు, శత్రుండతిమిత్రుడౌ, విషముదివ్యాహారమౌనెన్నగా
      నవనీ మండలి లోపలన్ శివ శివేత్యాభాషణోల్లాసికిన్
      శివ ! నీ నామము సర్వవశ్యకరమౌ, శ్రీకాళహస్తీశ్వరా !!  

    * పాలుం బువ్వయుఁబెట్టెదన్, గుడువరా పాపన్న, రా యన్న, లే
      లే లెమ్మన్న, నరంటి పండ్లు గొనితే, లేకున్ననే నొల్లనం
      టే, లాలింపరె తల్లి తండ్రులపు డట్టే తెచ్చి, వాత్సల్య ల
      క్ష్మీ లీలావచనంబులం గుడుపరా శ్రీకాళహస్తీశ్వరా !!  

    * పుడమి న్నిన్నొక బిల్వపత్రమున నే పూజించి, పుణ్యంబునుం
      బడయన్నేరక పెక్కుదైవములకుం బప్పుల్ ప్రసాదంబులుం
      గుడుముల్దోసెలు సారెసత్తు లటుకుల్ గుగ్గిళ్ళనుం బెట్టుచుం
      జెడి, యెందుం కొరగాకపోదు రకటా ! శ్రీకాళహస్తీశ్వరా !!  

ఫ (0)    

బ (0)    

భ (3)    

    * భవకేళీమదిరామదంబున మహాపాపాత్ముఁడై వీఁడు న
      న్ను వివేకింపఁడటంచు, నేను నరకార్ణోరాశిపాలైనఁ బ
      ట్టవు? బాలుండొకచోట నాటతమితోడ న్నూతఁ గూలంగఁ దం
      డ్రి విచారింపకయుండునా కటకటా ! శ్రీకాళహస్తీశ్వరా !  

    * భవదుఃఖంబులు రాజకీటముల నేఁ బ్రార్ధించినన్ బాయునే ?
      భవదంఘ్రిస్తుతి చేతగాక, విలసద్బాలక్షుథాక్లేశ దు
      ష్ట విధుల్మానునె ? చూడ మేకమెడచంటం తల్లి కారుణ్య దృ
      ష్టి విశేషంబుననిచ్చుచంటవలెనో శ్రీకాళహస్తీశ్వరా !!  

    * భసితోద్ధూళన ధూసరాంగులు జటాభారోత్తమాంగుల్ తపో
      వ్యసనుల్ సాధితపంచవర్ణరసనుల్ వైరాగ్యవంతుల్ నితాం
      తసుఖస్వాంతులు సత్యభాషణ సముద్యద్రత్నరుద్రాక్షరా
      జిసమేతుల్ తుదనెవ్వరైనఁ గొలుతున్ శ్రీకాళహస్తీశ్వరా !  

మ (7)    

    * మదమాతంగము లందలంబులు హరుల్మాణిక్యముల్పల్లకుల్
      ముదితల్ చిత్రదుకూలము ల్పరిమళంబు ల్మోక్షమీజాలునే
      మదిలో వీని నపేక్షజేసి నృపధామద్వార దేశంబు గాం
      చి దినంబుల్ వృథపుత్తురఙ్ఞు లకటా ! శ్రీకాళహస్తీశ్వరా !!  

    * మల భూయిష్ట మనోజధామము సుషుమ్నాద్వారమో ! యారు కుం
      డలియో పాదకరాక్షియుగ్మములు షట్చక్రంబులో! మోముదా
      జలజంబో నిటలంబు చంద్రకళయో సంగంబు యోగంబొ ? గా
      సిలి సేవింతురు కాంతలన్ భువిజనుల్ శ్రీకాళహస్తీశ్వరా !!  

    * మాయాజాండ కరండకోటి బొడిగా మర్ధించిరో విక్రమా
      జేయుం గాయజు చంపిరో, కపటలక్ష్మీ మోహముల్ బాసిరో,
      యాయుర్ధాయ భుజంగ మృత్యువు ననాయాసంబునన్ గెల్చిరో,
      శ్రేయోదాయకులౌదు రెట్టు లితరుల్ శ్రీకాళహస్తీశ్వరా !!  

    * మును నీచే నపవర్గ రాజ్యపదవీమూర్ధాభిశేకంబు గాం
      చిన పుణ్యాత్ములు నేను నొక్కసరివో చింతించి చూడంగ నె
      ట్లనినం గీటఫణీంద్రపోతమదవేదండోగ్ర హింసావిచా
      రినిఁగాఁగా నినుఁగానఁగాక మదిలో శ్రీకాళహస్తీశ్వరా !  

    * మును నేఁ బుట్టిన పుట్టులెన్నిగలవో, మోహంబుచే నందుఁ జే
      సిన కర్మంబుల ప్రోవులెన్నిగలవో, చింతించినం గాని, యీ
      జననంబే యని యున్నవాడ నిదియే చాలింపవే నిన్ను గొ
      ల్చిన పుణ్యంబునకుం గృపారతుడవై శ్రీకాళహస్తీశ్వరా !!  

    * మొదలన్ జేసినవారి ధర్మములు నిర్మూలంబుగాఁ చేసి దు
      ర్మదులై యిప్పుడు వారధర్మములొనర్పం, దమ్ము దైవంబు న
      వ్వదె ? రానున్న దురాత్ములెల్ల తమ త్రోవంబోవరే యేల చే
      సెదరో మీఁదు దలంచి చూడకధముల్ శ్రీకాళహస్తీశ్వరా !!  

    * మొదలన్ భక్తులకిచ్చినాఁడవు గదా మోక్షంబు నేఁడేమయా
      ముదియంగా ముదియంగఁబుట్టె ఘనమౌ మోహంబు లోభంబున
      న్నది సత్యంబు కృపందలంప వొక పుణ్యాత్ముండు నిన్నాత్మ గొ
      ల్చి దినంబున్మొఱవెట్టఁగా గటకటా ! శ్రీకాళహస్తీశ్వరా !  

య (0)    

ర (8)    

    * రతిరాజుద్ధతి మీఱనొక్క మఱి గోరాజాశ్వునిన్ నొక్కఁబో
      నతఁడా దర్పకు వేగ నొత్తఁ గవయం బాఁబోతునుందాఁకి యు
      గ్రతఁ బోరాడఁగ నున్న యన్నడిమి లేఁగల్వోలె శోకానల
      స్థితిపాలై మొఱపెట్టినన్ మనుపవే శ్రీకాళహస్తీశ్వరా !  

    * రాజన్నంతనె పోవునా ? కృపయు, ధర్మం, బాభిజాత్యంబు, వి
      ద్యాజాతక్షమ, సత్యభాషణము, విద్వన్మిత్ర సంరక్షయున్,
      సౌజన్యంబు, కృతంబెఱుంగుటయు, విశ్వాసంబు గాకున్న దు
      ర్బీజశ్రేష్ఠులుగా గతంబుగలదే శ్రీకాళహస్తీశ్వరా !!  

    * రాజర్థాతురుడైనచో నెచట ధర్మంబుండు ? నేరీతి నా
      నాజాతి క్రియలేర్పడున్ ? సుఖము మాన్యశ్రేణికెట్లబ్బు ? రూ
      పాజీవాళికి నేది దిక్కు ? ధృతి నీ భక్తుల్ భవత్పాద నీ
      రేజంబుల్ భజియింతు రే తెరగునన్ ? శ్రీకాళహస్తీశ్వరా !!  

    * రాజశ్రేణికి దాసులై సిరులఁ గోరం జేరఁగా సౌఖ్యమో
      యీ జన్మంబు తరింపఁజేయఁగల మిమ్మే ప్రొద్దు సేవించు ని
      ర్వ్యాజాచారము సౌఖ్యమో తెలియలేరో మానవు ల్బాపరా
      జీజాతాది మదాంధ బుద్ధులగుచున్ శ్రీకాళహస్తీశ్వరా !  

    * రాజుల్మత్తులు, వారి సేవ నరకప్రాయంబు, వారిచ్చు నం
      భోజాక్షీ చతురంతయాన తురగీ భూషాదు లాత్మవ్యథా
      బీజంబుల్, తదపేక్ష చాలు, పరితృప్తింబొందితిన్, జ్ఞానల
      క్ష్మీ జాగ్రత్పరిణామ మిమ్ము దయతో, శ్రీకాళహస్తీశ్వరా !!  

    * రాజై దుష్కృతి చెందె చందురుడు, రారాజై కుబేరుండు దృ
      గ్రాజీవంబున గాంచె దుఃఖము కురుక్ష్మాపాలుడా మాటనే
      యాజింగూలె సమస్త బంధువులతో, నారాజ శబ్దంబు ఛీ,
      ఛీ ! జన్మాంతరమందు నొల్లనుజుమీ ! శ్రీకాళహస్తీశ్వరా !!  

    * రోసిందేఁటిది రోఁతలేఁటిది మనోరోగస్థుఁడై దేహి తాఁ
      బూసిందేఁటిది పూఁతలేఁటివి మదాపూతంబులీ దేహంబుల్
      మూసిందేఁటిది మూఁతలేఁటివి సదా మూఢత్వమే కాని తాఁ
      జేసిందేఁటిది చేఁతలేఁటివి వృథా శ్రీకాళహస్తీశ్వరా !  

    * రోసీరోయదు కామినీజనుల తారుణ్యోరు సౌఖ్యంబులన్,
      పాసీపాయదు పుత్రమిత్రజన సంపద్భ్రాంతి, వాంఛాలతల్
      కోసీకోయదు నామనం బకట ! నీకున్ ప్రీతిగా సత్క్రియల్
      చేసీచేయదు, దీనిత్రుళ్ళణపవే ! శ్రీకాళహస్తీశ్వరా !!  

ల (1)    

    * లేవో కానలఁ గందమూలఫలముల్, లేవో గుహ ల్తోయముల్
      లేవో యేఱుల పల్లవాస్తరణముల్, లేవో సదాయాత్మలో
      లేవో నీవు విరక్తులన్మనుప, జాలింబొంది, భూపాలురన్
      సేవల్సేయగ బోదురేలొకొ జనుల్ శ్రీకాళహస్తీశ్వరా !!  

వ (6)    

    * వన్నే యేనుగుతోలు దుప్పటము, బువ్వాకాలకూటంబు, చే
      గిన్నే బ్రహ్మకపాల ముగ్రమగు భోగే కంఠహారంబు, మే
      ల్నిన్నీలాగున నుండియుం తెలిసియు న్నీ పాదపద్మంబు చే
      ర్చెన్నారాయణుడెట్లు మానసముఁ దా శ్రీకాళహస్తీశ్వరా !!  

    * వాణీవల్లభ దుర్లభంబగు భవద్ద్వారంబు నన్నిల్చి, ని
      ర్వాణశ్రీఁ జెఱపట్ట చూచిన విచారద్రోహమో, నిత్య క
      ల్యాణక్రీడలఁబాసి, దుర్దశలపాలై, రాజలోకాధమ
      శ్రేణీద్వారము దూరఁ జేసి దిపుడో శ్రీకాళహస్తీశ్వరా !  

    * విత్తజ్ఞానము పాడుచిత్తము, భవావేశంబు రక్షాంబువుల్
      మత్తత్త్వంబు తదంకురం బనృతముల్, మారాకులత్యంత దు
      ర్వృత్తుల్ పువ్వులు పండ్లు మన్మథ ముఖావిర్భూత దోషంబులుం
      జిత్తాభ్యున్నత నింబ భూజమునకున్, శ్రీకాళహస్తీశ్వరా !!  

    * వీడెంబబ్బినయప్పుడున్ దమస్తుతుల్ విన్నప్పుడుం బొట్టలో
      కూడున్నప్పుడు శ్రీవిలాసములుపైకొన్నప్పుడున్ గాయకుల్
      పాడంగా వినునప్పుడున్ జెలగు ధంభప్రాయువిశ్రాణన
      క్రీడాసక్తుల నేమి చెప్పవలెనో శ్రీకాళహస్తీశ్వరా !!  

    * వెనుకం జేసిన ఘోరదుర్దశలు భావింపంగ రోఁతయ్యెడున్
      వెనుకన్ముందటవచ్చు దుర్మరణము ల్వీక్షింప భీతయ్యెడున్
      నను నేఁ జూచియు నా విధుల్దలచియు న్నాకే భయంబయ్యెడుం
      జెనకుంజీకటినాయెఁ గాలమునకున్ శ్రీకాళహస్తీశ్వరా !!  

    * వేధం దిట్టగరాదు గాని భువిలో విద్వాంసులం జేయనే
      లా ధీచాతురిఁ జేసిఁ జేసిన గులామాపాటునే పోక క్షు
      ద్బాధాదుల్ కలిగింపనేల యదికృత్యంబైన దుర్మార్గులం
      ఛీ ! ధాత్రీశులఁ జేయనేటి కకటా ! శ్రీకాళహస్తీశ్వరా !!  

శ (4)    

    * శుకము ల్కింశుకపుష్పము ల్గని ఫలస్తోమంబటంచు న్సము
      త్సుకతం జేరగబోవ నచ్చట మహాదుఃఖంబు సిద్ధించుఁ గ
      ర్మ కళాభాషలకెల్ల ప్రాపులగు శాస్త్రంబు ల్విలోకించువా
      రికి నిత్యత్వమనీష దూరమగునో శ్రీకాళహస్తీశ్వరా !!  

    * శ్రీ విద్యుత్కలితాజవంజవ మహా జీమూత పాపాంబు ధా
      రా వేగంబున మన్మనోజ్జ సముదీర్ణత్వంబు గోల్పోయితిన్
      దేవా ! మీ కరుణా శరత్సమయ మింతేఁ జాలు, సద్భావనా
      సేవం దామరతంపరై మనియెదన్ శ్రీకాళహస్తీశ్వరా !  

    * శ్రీశైలేశు భజింతునో, యభవుఁ గాంచీనాథు సేవింతునో
      కాశీవల్లభుఁ గొల్వబోదునొ, మహిన్ కాళేశుఁ బూజింతునో
      నా శీలంబణువైన మేరువనుచున్ రక్షింపవే, నీ కృపా
      శ్రీ శృంగార విలాసహాసములచే శ్రీకాళహస్తీశ్వరా !!  

    * శ్రుతులభ్యాసముచేసి శాస్త్రగరిమల్శోధించి తత్త్వంబులన్
      మతినూహించి, శరీరమస్థిరము, బ్రహ్మంబన్న, సత్యంబు గాం
      చితిమంచున్ సభలన్ వృథావచనము ల్చెప్పంగనే కాని, ని
      ర్జిత చిత్తస్థిరసౌఖ్యముల్ తెలియరో శ్రీకాళహస్తీశ్వరా !!  

ష (0)    

స (6)    

    * సంతోషించితి చాలు చాలు రతిరాజద్వార సౌఖ్యంబులన్
      శాంతిన్ బొందితి చాలు చాలు బహురాజద్వార సౌఖ్యంబులన్
      శాంతిం బొందెద జూపు బ్రహ్మపద రాజద్వార సౌఖ్యంబు ని
      శ్చింతన్ శాంతుడనౌదు నీ కరుణచే శ్రీకాళహస్తీశ్వరా !!  

    * సంపద్గర్వముఁ బారద్రోలి, రిపులన్ జంకించి, యాకాంక్షలన్
      దంపుల్వెట్టి, కళంకముల్నఱికి, బంధక్లేశ దోషంబులన్
      జింపుల్చేసి, వయోవిలాసములు సంక్షేపించి, భూతంబులన్
      జెంపల్వేయక నిన్నుఁ గాననగునా ? శ్రీకాళహస్తీశ్వరా !!  

    * సలిలమ్ము ల్చిలుకప్రమాణ మొక పుష్పమ్ము న్భవన్మౌళి ని
      శ్చలభక్తి ప్రతిపత్తిచే నరుడు పూజన్సేయగా ధన్యుడౌ
      నిల గంగాజల చంద్రఖండముల దా నిందుం దుదింగాంచు నీ
      చెలువంబంతయు నీ మాహత్త్యమిదిగా శ్రీకాళహస్తీశ్వరా !!  

    * సులభుల్మూర్ఖు లనుత్తమోత్తములు రాజుల్గల్గి యేవేళన
      న్నలఁతం బెట్టిన నీ పదాబ్జములఁ బాయంజాల నేమిచ్చినం
      గలధౌతాచల మేలుటంబునిధిలోఁ గాపుండుటబ్జంబుపైఁ
      జెలువొప్పన్సుఖియింపఁ గాంచుటసుమీ శ్రీకాళహస్తీశ్వరా !  

    * స్తోత్రంబన్యులఁ జేయనొల్లని వ్రతస్థుల్వోలె వేసంబుతోఁ
      బుత్త్రీపుత్త్ర కళత్రరక్షణ కళాబుద్ధిన్ నృపాలాధమున్
      బాత్రంబంచు భజింపఁబోదు రిదియు న్బావ్యంబె యెవ్వారి చా
      రిత్రంబెన్నఁడు మెచ్చనెంత మదిలో శ్రీకాళహస్తీశ్వరా !  

    * స్వామిద్రోహముచేసి, వేరొకని కొల్వన్ బోతినో, కాక నే
      నీమాటల్విన నొల్ల కుండితినో, నిన్నే దిక్కుగా జూడనో ?
      యేమీ యిట్టి వృథాపరాధియగు నన్నీ దుఃఖవారాశి వీ
      చీమధ్యంబున ముంచి యుంపఁదగునా ? శ్రీకాళహస్తీశ్వరా !  

హ (0)    

ళ (0)    

క్ష (2)    

    * క్షితినాథోత్తమ ! సత్కవీశ్వరుఁడు వచ్చెన్ మిమ్ములంజూడఁగా
      నతఁడే మేటి కవిత్వవైఖరిని ? సద్యఃకావ్యవిర్మాత త
      త్ప్రతిభ ల్మంచివి తిట్టుపద్యములు చెప్పండాతఁడైనన్ మముం
      గ్రితమే చూచెను బొమ్మటంచు రధముల్ శ్రీకాళహస్తీశ్వరా !  

    * క్షితిలో దొడ్డతురంగసామజములే చిత్రమ్ము లాందోళికా
      తతులే లెక్క విలాసినీజన సువస్త్రవ్రాత భూషాకలా
      ప తనూజాదికమేమి దుర్లభము నీ పాదమ్ము లర్చించుచో
      జితపంకేరుహ పాదపద్మయుగళా శ్రీకాళహస్తీశ్వరా !  

ఱ (1)    

    * ఱాలన్ ఱువ్వగ చేతులాడవు, కుమారా రమ్మురమ్మంచు నే
      చాలన్ చంపగ, నేత్రము ల్దివియగా శక్తుండ నే గాను, నా
      శీలంబేమని చెప్పనున్న దిక నీ చిత్తంబు, నా భాగ్యమో
      శ్రీలక్ష్మీపతి సేవితాంఘ్రియుగళా ! శ్రీకాళహస్తీశ్వరా !!