కృష్ణ శతకము
* అక్రూరవరద మాధవ
చక్రాయుధ ఖడ్గపాణి శౌరి ముకుందా
శక్రాది దివిజసన్నుత
శుక్రార్చిత నన్నుఁ గరుణ జూడుము కృష్ణా!
* అగణిత వైభవ కేశవ
నగధర వనమాలి యాదినారయణ యో
భగవంతుడ శ్రీమంతుడ
జగదీశ్వర శరణు శరణు శరణము కృష్ణా!
* అనుదినము కృష్ణ శతకము
వినినఁ బఠించినను ముక్తి వేడుక గలుగున్
ధనధాన్యము గోగణములు
తనయులు నభివృద్ధిఁ బొందు దద్దయుఁ గృష్ణా!
* అపరాధ సహస్రంబుల
నపరిమితములైన యఘము లనిశము నేనున్
గపటాత్ముఁడనై చేసితిఁ
జపలుని ననుగావు శేషశాయివి కృష్ణా!
* అప్పా యిత్తువు దయతో
నప్పాలను నతిరసంబు లనుభవశాలీ
యప్పా నను గనుఁగొనవే
యప్పా నను బ్రోవు వేంకటప్పా కృష్ణా!
* అయ్యా పంచేంద్రియములు
నుయ్యాలల నూచినట్టు లూచఁగ నేనున్
జయ్యన గలఁగుచు నుంటిని
గుయ్యాలింపుము మహాత్మ గుఱుతుగఁ గృష్ణా!
* అల్ల జగన్నాథుకు వ్రే
పల్లియ క్రీడార్థ మయ్యెఁ బరమాత్మునకున్
గొల్లసతి యా యశోదయుఁ
దల్లియునై చన్నుగుడిపెఁ దనరఁగఁ గృష్ణా!
* అష్టమి రోహిణి ప్రొద్దున
నష్టమగర్భమునఁ బుట్టి యాదేవకికిన్
దుష్టునిఁ గంసు వధింపవె
సృష్టిప్రతిపాదనంబు సేయఁగఁ గృష్ణా!
ఆ (2)
* ఆ దండకావనంబున
కోదండముఁ దాల్చినట్టి కోమలమూర్తీ
నాదండ గావ రమ్మీ
వేదండము కాచినట్టి వేల్పువు కృష్ణా!
* ఆదివరాహమ వయి నీ
వా దనుజు హిరణ్యనేత్రు హతుఁజేసి తగన్
మోదమున సురలు పొగడఁగ
మేదిని వడి గొడుగునెత్తి మెఱసితి కృష్ణా!
ఇ (1)
* ఇరువదొకమాఱు నృపతుల
శిరములు ఖండిచితౌర చేగొడ్డంటన్
ధరఁ గశ్యపునకు నిచ్చియుఁ
బరఁగవె జమదగ్ని రామభద్రుడ కృష్ణా!
ఈ (0)
ఉ (0)
ఊ (0)
ఋ (0)
ౠ (0)
ఎ (1)
* ఎటువలెఁ గరిమొఱ వింటివి
ఎటువలెఁ బ్రహ్లాదు కభయమిచ్చితి కరుణన్
అటువలె నను రక్షింపుము
కటకట నిను నమ్మినాఁడ గావుము కృష్ణా!
ఏ (2)
* ఏ తండ్రి కనకకశ్యపు
ఘాతకుఁడై యతనిసుతుని గరుణను గాచెన్
ప్రీతి సురకోటి పోగడఁగ
నా తండ్రీ నిన్ను నేను నమ్మితి గృష్ణా!
* ఏ విభుఁడు ఘోరరణమున
రావణుఁ వధియించి లంకరాజుగ నిలిపెన్
దీవించి యావిభీషణు
నావిభు నేఁ దలఁతు మదిని నచ్యుత కృష్ణా!
ఐ (0)
ఒ (1)
* ఒకసారి నీదునామము
ప్రకటముగాఁ దలఁచువారి పాపము లెల్లన్
వికలములై తొలఁగుటకును
సకలార్థ యజామిళుండు సాక్షియె కృష్ణా!
ఓ (3)
* ఓ కారుణ్యపయోనిధి
నా కాధారంబ వగుచు నయముగఁ బ్రోవన్
నాకేల యితర చింతలు
నాకాధిపవినుత లోక నాయక కృష్ణా!
* ఓ పుండరీక లోచన
యో పురుషోత్తమ ముకుంద యో గోవిందా
యో పుర సంహర మిత్రుఁడ
యో పుణ్యుఁడ నన్నుఁ బ్రోవు మో హరి కృష్ణా!
* ఓ భవబంధ విమోచన
ఓ భరతాగ్రజ మురారి యో రఘురామా
ఓ భక్తకామధేనువ
ఓ భయహర నన్నుగావు మో హరి కృష్ణా!
ఔ (0)
అం (6)
* అంగన పనుపున దోవతి
కొంగున నటుకులను ముడుచుకొని వచ్చిన యా
సంగతి విని దయనొసఁగితి
రంగుగ సంపదలు లోక రక్షక కృష్ణా!
* అండజవాహన విను బ్ర
హ్మాండంబుల బంతులట్ల యాడెడు నీ వా
కొండల నెత్తితి వందురు
కొండిక పనిగాక దొడ్డ కొండా కృష్ణా!
* అందఱు సురలును దనుజులు
పొందుగ క్షీరాబ్ధిఁ దఱువఁ బొలుపున నీ వా
నందంబుగఁ గూర్మమువై
మందరగిరి నెత్తితౌర మాధవ కృష్ణా!
* అందెలు గజ్జెలు మ్రోయఁగఁ
జిందులు ద్రొక్కుచును వేడ్క చెలువారంగా
నందుని సతి యా గోపిక
ముందఱ నాడుదువు మిగుల మురియుచుఁ గృష్ణా!
* అందెలు పాదములందును
సుందరముగ నుంచినావు సొంపలరంగా
మందరధర మునిసన్నుత
నందుని వరపుత్ర నిన్ను నమ్మితిఁ గృష్ణా!
* అంసాలంబితకుండల
కంసాంతక నీవు ద్వారకాపురిలోనన్
సంసారి రీతి నుండి ప్ర
శంసార్హుఁడ వైతి వహహ జగతిని గృష్ణా!
అః (0)
క (8)
* కంటికి ఱెప్పవిధంబున
బంటుగదా యనుచు నన్నుఁ బాయక యెపుడున్
జంటయు నీ వుండుట నే
కంటక మగు పాపములను గడచితిఁ గృష్ణా!
* కందర్పకోటి సుందర
మందరధర భానుతేజ మంజులదేహా
సుందర విగ్రహ మునిగణ
వందిత మిము దలతు భక్తవత్సల కృష్ణా!
* కుంభీంద్ర వరద! కేశవ!
జంభాసురవైరి! దివిజసన్నుత చరితా!
అంభోజనేత్ర! జలనిధి
గంభీరా! నన్ను గావు కరుణను కృష్ణా!
* కుక్షిని నఖిలజగంబుల
నిక్షేపముఁజేసి ప్రళయ నీరధి నడుమన్
రక్షక వట పత్రముపై
దక్షతఁ బవళించునట్టి ధన్యుఁడ కృష్ణా!
* కెరలి యఱచేతఁ గంబము
నరుదుగ వేయుటను వెడలి యసురేశ్వరునిన్
ఉరమును జీరి వధించితి
నరహరి రూపావతార నగధర కృష్ణా!
* కొంచెపు వాఁడని మదిలో
నెంచకుమీ వాసుదేవ యిభవరద హరీ
యంచితముగ నీ కరుణకుఁ
గొంచెము నధికంబు గలదె కొంతయుఁ గృష్ణా!
* క్రతువులు తీర్థాటనములు
వ్రతములు దానములు సేయ వలెనా లక్ష్మీ
పతి మిముఁ దలచిన వారికి
నతులిత పుణ్యములు గలుగు టరుదే కృష్ణా!
* క్రూరాత్ముఁ డజామీళుఁడు
నారాయణ యనుచు నాత్మనందనుఁ బిలువన్
యేరీతి నేలుకొంటివి
యేరీ నీపాటి వేల్పు లెందును కృష్ణా!
ఖ (0)
గ (5)
* గంగ మొదలైన నదులను
మంగళముగఁ జేయునట్టి మజ్జనములకున్
సంగతి గలిగిన ఫలములు
రంగుగ మిముఁదలఁచు సాటి రావుర కృష్ణా!
* గజరాజవరద కేశవ
త్రిజగత్కల్యాణమూర్తి దేవ మురారీ
భుజగేంద్రశయన మాధవ
విజయాప్తుఁడ నన్నుఁగావు వేగమె కృష్ణా!
* గిరులందు మేరువౌదువు
సురులందున నింద్రుఁడౌదు చుక్కలలోనన్
బరమాత్మ చంద్రుఁడౌదువు
నరులందున నృపతివౌదు నయముగఁ గృష్ణా!
* గోపాల కృష్ణ మురహర
పాపాలను బాఱఁద్రోలు ప్రభుఁడవు నీవే
గోపాలమూర్తి దయతో
నాపాలిటఁ గలిగి ప్రోవు నమ్మితిఁ గృష్ణా!
* గ్రహభయదోషము లొందవు
బహుపీడలు చేర వెఱచుఁ బాయును నఘముల్
ఇహపర ఫలదాయక విను
తహతహ లెక్కడివి నిన్నుఁ దలఁచినఁ గృష్ణా!
ఘ (1)
* ఘనులగు ధేనుకముష్టిక
దనుజులఁ జెండాడి తౌర తగ భుజశక్తిన్
అనఘాత్మ రేవతీపతి
యనఁగా బలరామమూర్తి వైతివి కృష్ణా!
ఙ (0)
చ (3)
* చిలుక లొకరమణిముద్దుల
చిలుకను శ్రీరామ యనుచు శ్రీపతి పేరున్
బిలిచిన మోక్షము నిచ్చితి
వలరఁగ మిముఁ దలఁచుజనుల కరుదా కృష్ణా!
* చుక్కల నెన్నఁగ వచ్చును
గ్రక్కున భూరేణువులను గణుతింప నగున్
జొక్కపు నీ గుణజాలము
నక్కజ మగు లెక్కపెట్ట నజునకుఁ గృష్ణా!
* చూపుము నీరూపంబును
బాపపు దుష్కృతము లెల్లఁ బంకజనాభా
పాపుము నాకును దయతో
శ్రీపతి నిను నమ్మినాఁడ సిద్ధము కృష్ణా!
ఛ (0)
జ (1)
* జయమును విజయున కియ్యవె
హయముల ములుకోల మోపి యదలించి మహా
రయమున రొప్పవె తేరును
భయమున రిపుసేన విఱిగి పాఱఁగఁ గృష్ణా!
ఝ (0)
ఞ (0)
ట (0)
ఠ (0)
డ (0)
ఢ (0)
ణ (0)
త (4)
* తటతట లేటికిఁ జేసెదు
కటకట పరమాత్మ నీవు ఘంటాకర్ణున్
ఎటువలె పుణ్యునిఁ జేసితి
వటువలె రక్షింపుమయ్య యచ్యుత కృష్ణా!
* తిరుమణి దురితవిదూరము
తిరుమణి సౌభాగ్యకరము త్రిజగములందున్
తిరుమణిఁ బెట్టిన మనుజుఁడు
పరమపవిత్రుండు భాగ్యవంతుడు కృష్ణా!
* తురగాధ్వరంబుఁ జేసిన
పురుషులకును వేఱెపదని పుట్టుట యేమో
హరి మిముఁ దలఁచిన వారికి
నరుదా కైవల్యపదవి యచ్యుత కృష్ణా!
* త్రిపురాసుర భార్యల నతి
నిపుణతతో వ్రతముచేత నిలిపితి కీర్తుల్
కృపగల రాజవు భళిరే
కపటపు బుద్ధావతార ఘనుఁడవు కృష్ణా!
థ (0)
ద (10)
* దండమయా విశ్వంభర
దండమయా పుండరీక దళనేత్ర హరీ
దండమయా కరుణానిధి
దండమయా నీకునెపుడు దండము కృష్ణా!
* దశకంఠునిఁ బరిమార్చియు
గుశలముతో సీతఁ దెచ్చికొనియు నయోధ్యన్
విశదముగఁ గీర్తి నేలిన
దశరథరామావతార ధన్యుఁడ కృష్ణా!
* దిక్కెవ్వరు ప్రహ్లాదుకు
దిక్కెవ్వరు పాండుసుతుల దీనుల కెపుడున్
దిక్కెవ్వ రయ్యహల్యకు
దిక్కెవ్వరు నీవె నాకు దిక్కువు కృష్ణా!
* దివిజేంద్రసుతునిఁ జంపియు
రవిసుతు రక్షించినావు రఘురాముఁడవై
దివిజేంద్రసుతునిఁ గాచియు
రవిసుతుఁ బరిమార్చితౌర రణమునఁ గృష్ణా!
* దుర్జనులగు నృపసంఘము
నిర్జింపఁగఁ దలచి నీవు నిఖిలాధారా
దుర్జనులను వధియింపను
నర్జును రధచోదకుండ వైతివి కృష్ణా!
* దుర్భర బాణము రాఁగా
గర్భములోనుండి యభవ కావు మటన్నన్
నిర్భరకృప రక్షించితి
వర్భకు నభిమన్యుసుతుని నచ్యుత కృష్ణా!
* దుర్మతిని మిగుల దుష్టపుఁ
గర్మంబులఁ జేసినట్టి కష్టుఁడ నన్నున్
నిర్మలునిఁ జేయవలె ని
ష్కర్ముఁడ నిను నమ్మినాను సతతము కృష్ణా!
* దుర్వార చక్రధరకర
శర్వాణీ భర్తృవినుత జగదాధారా
నిర్వాణనాథ మాధవ
సర్వాత్మక నన్నుఁగావు సరగున కృష్ణా!
* దుష్టుండ ననాచారుడఁ
దుష్టచరిత్రుడను చాల దుర్బుద్ధిని నేఁ
నిష్ఠ నిను గొల్వనేరని
కష్టుడ నగు నన్ను కావు కరుణను కృష్ణా!
* దేవేంద్రుఁ డలుకతోడను
వావిరిగా ఱాళ్ళవాన వడిఁ గురియింపన్
గోవర్ధనగిరి యెత్తితి
గోవుల గోపకులఁ గాచు కొఱకై కృష్ణా!
ధ (0)
న (6)
* నందుని ముద్దుల పట్టిని
మందరగిరి ధరుని హరిని మాధవు విష్ణున్
సుందరరూపుని మునిగణ
వందితు నిను దలతు భక్తవత్సల కృస్ణా!
* నరపశువ మూఢచిత్తుఁడ
దురితారంభుఁడను మిగుల దోషగుఁడను నీ
గుఱు తెఱుఁగ నెంతవాఁడను
హరి నీవే ప్రాపు దాపు వౌదువు కృష్ణా!
* నారాయణ పరమేశ్వర
ధారాధర నీలదేహ దానవ వైరీ
క్షీరాబ్ధిశయన యదుకుల
వీరా ననుగావు కరుణ వెలయగ కృష్ణా!
* నారాయణ లక్ష్మీపతి
నారాయణ వాసుదేవ నందకుమారా
నారాయణ నిను నమ్మితి
నారాయణ నన్నుఁ బ్రోవు నగధర కృష్ణా!
* నీ నామము భవహరణము
నీ నామము సర్వసౌఖ్య నివహ కరంబున్
నీ నామ మమృత పూర్ణము
నీ నామము నేఁదలంతు నిత్యము కృష్ణా!
* నీవే తల్లివి తండ్రివి
నీవే నా తోడు నీడ నీవే సఖుడౌ
నీవే గురుడవు దైవము
నీవే నా పతియు గతియు నిజముగ కృష్ణా!
ప (9)
* పంచేంద్రియ మార్గంబులఁ
గొంచెపు బుద్ధిని జరించి కొన్ని దినంబుల్
ఇంచుక సజ్జన సంగతి
నెంచగ మిమ్మెఱిఁగినాఁడ నిప్పుడె కృష్ణా!
* పదియాఱువేల నూర్వురు
సుదతులు నెనమండ్రు నీకు సొంపుగ భార్యల్
విదితంబుగ బహురూపుల
వదలక రమియింతువౌర వసుధను గృష్ణా!
* పదునాలుగు భువనంబులు
కుదురుగ నీ కుక్షి నిల్పుకొను నేర్పరివై
విదితంబుగ నా దేవకి
యుదరములో నెట్టులొదిగి యుంటివి కృష్ణా!
* పరనారీ ముఖపద్మము
గుఱుతుగఁ గుచకుంభములను గొప్పును నడుమున్
అరయఁగఁ గని మోహింతురు
నిరతము నిను భక్తిఁ గొల్వ నేరరు కృష్ణా!
* పరులను నడిగిన జనులకు
కుఱుచ సుమీ యిది యటంచు గుఱుతుగ నీవున్
గురుచఁడవై వేఁడితి మును
ధరఁ బాదత్రయము బలిని దద్దయుఁ గృష్ణా!
* పరుసము సోకిన యినుమును
వరుసగ బంగారమైన వడుపున జిహ్వన్
హరి నీ నామము సోకిన
సురవందిత నేను నటుల సులభుఁడ గృష్ణా!
* పాణితలంబున వెన్నయు
వేణీమూలంబునందు వెలయఁగఁ బింఛం
బాణీముత్యము ముక్కున
నాణెముగాఁదాల్చు లోక నాథుఁడ కృష్ణా!
* పాలను వెన్నయుఁ మ్రుచ్చిల
ఱోలను మీ తల్లి కట్ట రోషముతోడన్
లీలావినోది వైతివి
బాలుఁడవా బ్రహ్మఁగన్న ప్రభుఁడవు కృష్ణా!
* పురుషోత్తమ లక్ష్మీపతి
సరసిజగర్భాది మౌనిసన్నుత చరితా
మురభంజన సురరంజన
వరదుఁడ వగు నాకు భక్త వత్సల కృష్ణా!
ఫ (0)
బ (2)
* బలమెవ్వఁడు కరిఁ బ్రోవను
బలమెవ్వఁడు పాండు సుతుల భార్యను గావన్
బలమెవ్వఁడు రవిసుతునకు
బలమెవ్వఁడు నాకు నీవ బలమౌఁ గృష్ణా!
* బృందావనమున బ్రహ్మా
నందార్భకమూర్తి వేణు నాదము నీ వా
మందార మూలమున గో
విందా పూరింతువౌర వేడుకఁ గృష్ణా!
భ (2)
* భద్రార్చిత పదపద్మ సు
భద్రాగ్రజ సర్వలోక పాలన హరి శ్రీ
భద్రాధిప కేశవ బల
భద్రానుజ నన్ను బ్రోవు భవహర కృష్ణా!
* భారద్వాజసగోత్రుఁడ
గారవమున గంగమాంబ కరుణాసుతుఁడన్
పేర నృసింహాహ్వయుఁడను
శ్రీరమయుత నన్నుఁగావు సృష్టినిఁ గృష్ణా!
మ (3)
* మందుఁడ నే దురితాత్ముఁడ
నిందల కొడిఁగట్టినట్టి నీచుని నన్నున్
సందేహింపక కావుము
నందుని వరపుత్ర నిన్ను నమ్మితి గృష్ణా!
* మగమీనమవై జలనిధిఁ
బగతుని సోమకునిఁ జంపి పద్మభవునకున్
నిగమముల దెచ్చి యిచ్చితి
సుగుణాకర మమ్ముఁ గరుణ జూడుము కృష్ణా!
* మడుగుకుఁ జని కాళీయుని
పడగలపై భరతశాస్త్ర పద్ధతి వెలయన్
గడువేడుకతో నాడెడు
నడుగులు నా మదిని దలఁతు నచ్యుత కృష్ణా!
య (1)
* యమునకు నిఁక నే వెఱువను
కమలాక్ష జగన్నివాస కామితఫలదా
విమలమగు నీదు నామము
నమరఁగఁ దలఁచెదను వేగ ననిశము కృష్ణా!
ర (1)
* రఘునాయక నీ నామము
లఘుమతితోఁ దలఁపఁగలనె లక్ష్మీరమణా
లఘములఁ బాపుము దయతో
రఘురాముఁడ వైన లోక రక్షక కృష్ణా!
ల (0)
వ (7)
* వడుగువునై మూఁడడుగుల
నడిగితివౌ భళిర భళిర యఖిలజగంబుల్
తొడిగితివి నీదు మేనునఁ
గడు చిత్రము నీ చరిత్ర ఘనుఁడవు కృష్ణా!
* వనజాక్ష భక్తవత్సల
ఘనులగు త్రైమూర్తులందుఁ గరుణానిధివై
కన నీ సద్గుణజాలము
సనకాది మునీంద్రులెన్నఁ జాలరు కృష్ణా!
* వలపుగల తేజి నెక్కియు
నిలపై ధర్మంబు నిలుప హీనులఁ ద్రుంపన్
కలియుగము తుదను వేడుక
కలికివిగా నున్న లోకకర్తవు కృష్ణా!
* వారిజ నేత్రలు యమునా
వారిని జలకంబులాడ వచ్చిన నీ వా
చీరలు మ్రుచ్చిలి యిచ్చితి
నేరుపురా యదియు నీకు నీతియె కృష్ణా!
* వావిరి నీ భక్తులకున్
గావరమున నెగ్గు సేయు గర్వాంధులకున్
దేవ వధించుట వింటిని
నీ వల్లను భాగ్యమయ్యె నిజముగఁ కృష్ణా!
* విశ్వోత్పత్తికి బ్రహ్మవు
విశ్వము రక్షింపఁ దలఁచి విష్ణుఁడ వనగా
విశ్వము జెఱుపను హరుఁడవు
విశ్వాత్మక నీవె యగుచు వెలయుదు కృష్ణా!
* వేదంబులు గననేరని
యాది పరబ్రహ్మమూర్తి వనఘ మురారీ
నాదిక్కుఁ జూచి కావుము
నీ దిక్కే నమ్మినాఁడ నిజముగఁ గృష్ణా!
శ (7)
* శక్రసుతుఁ గాచు కొఱకై
చక్రము చేపట్టి భీష్ముఁ జంపఁగ చను నీ
విక్రమ మేమని పొగడుదు
నక్రాగ్రహ సర్వలోక నాయక కృష్ణా!
* శతకోటి భానుతేజా
యతులిత సద్గుణగణాఢ్య యంబుజనాభా
రతినాథజనక లక్ష్మీ
సతిహిత ననుఁ గావు భక్త వత్సల కృష్ణా!
* శిరమున రత్నకిరీటము
కరయుగమున శంఖచక్ర ఘనభూషణముల్
ఉరమున వజ్రపుఁ బతకము
సిరినాయక యమరవినుత శ్రీహరి కృష్ణా!
* శుభ్రమగు పాంచజన్యము
నభ్రంకషమగుచు మ్రోవ నాహవభూమిన్
విభ్రమలగు దనుజసుతా
గర్భంబుల పగులఁజేయు ఘనుడవు కృష్ణా!
* శ్రీ రుక్మిణీశ కేశవ
నారద సంగీతలోల నగధర శౌరీ
ద్వారకనిలయ జనార్దన
కారుణ్యముతోడ మమ్ముఁ గావుము కృష్ణా!
* శ్రీ లక్ష్మీ నారాయణ
వాలాయము నిన్నుఁ దలఁతు వందితచరణా
ఏలుము నను నీ బంటుగఁ
జాలఁగ నిను నమ్మినాను సరసుఁడ కృష్ణా!
* శ్రీధర మాధవ యచ్యుత
భూధర పురుహూతవినుత పురుషోత్తమ నీ
పాదయుగళంబు నెప్పుడు
మోదముతో నమ్మినాఁడ ముద్దుల కృష్ణా!
ష (0)
స (2)
* సుత్రామనుత జనార్థన
సత్రాజిత్తనయనాథ సౌందర్యకళా
చిత్రావతార దేవకి
పుత్రా ననుఁగావు నీకు బుణ్యము కృష్ణా!
* స్తంభమున వెడలి దానవ
డింభకు రక్షించినట్టి రీతిని వెలయన్
అంభోజనేత్ర జలనిధి
గంభీరుఁడ నన్నుఁ గావు కరుణను గృష్ణా!
హ (5)
* హరి నీవె దిక్కు నాకును
సిరితో నేతెంచి మకరి శిక్షించి దయన్
బరమేష్టి సురలు పొగడగ
కరిగాచినరీతి నన్ను కావుము కృష్ణా!
* హరి సర్వంబునఁ గలఁడని
గరిమను దైత్యుండు పలుకఁ గంబములోనన్
ఇరవొంది వెడలి చీల్చవె
శరణనఁ బ్రహ్లాదుడిందు సాక్షియె కృష్ణా!
* హరిచందనంబు మేనునఁ
గరమొప్పెడు హస్తములను గంకణ రవముల్
ఉరమున రత్నము మెఱయఁగఁ
బరఁగితివౌ నీవు బాల ప్రాయము కృష్ణా!
* హరియను రెండక్షరములు
హరియించును పాతకముల నంబుజనాభా
హరి నీ నామమహత్త్వము
హరి హరి పొగడంగవశమె హరి శ్రీ కృష్ణా!
* హా వసుదేవ కుమారక
కావుము నా మాన మనుచు కామిని వేఁడన్
ఆ వనజాక్షికి నిచ్చితి
శ్రీవర యక్షయ మటంచు జీరలు కృష్ణా!
